Vaxtarsprotar

Framleiðnisjóður landbúnaðarins og Impra á Nýsköpunarmiðstöð Íslands hafa gert samkomulag um stuðningsverkefni sem hefur það að markmiði að hvetja til fjölbreyttrar atvinnusköpunar í sveitum landsins. Verkefnið er nefnt Vaxtarsprotar.

Verkefnið nær til landsins alls en unnið er innan ákveðinna svæða hverju sinni. Þau svæði sem verkefnið mun beinast að á árinu 2008 eru annars vegar Þingeyjarsýslur (vormisseri) og hins Dalir og Reykhólahreppur (haustmisseri). Verkefnið er unnið í samstarfi við landbúnaðarráðunauta á hverju svæði sem og atvinnuþróunarfélög. 

Fyrir hverja er verkefnið?
Verkefnið er opið öllum íbúum í sveit, óháð eðli viðskiptahugmynda, atvinnugreinum, eða reynslu þátttakenda á sviði atvinnurekstrar. Íbúar í þéttbýli geta einnig tekið þátt, en ábúendur á lögbýlum hafa forgang. Þátttakendur vinna með eigin viðskiptahugmyndir. Fulltrúum starfandi fyrirtækja er einnig velkomið að taka þátt með það að markmiði að vinna að frekari framþróun eða mótun nýjunga í rekstri sínum. Þátttaka í Vaxtarsprotum er án endurgjalds.

Ferli verkefnisins

Verkefnið byggir á ákveðnu ferli sem má lýsa á eftirfarandi hátt:

1. Kynning á verkefninu.
2. Fræðsla og leiðsögn við hugmyndavinnu og undirbúning viðskiptahugmynda (bæði í námskeiðaformi og gegnum einstaklingsmiðaða leiðsögn).
3. Kynning á möguleikum á fjárstyrkjum frá Impru og Framleiðnisjóði og leiðsögn við gerð umsókna.
4. Eftirfylgni og áframhaldandi leiðsögn.

Þátttaka í verkefninu ein og sér felur ekki í sér vilyrði fyrir fjárstyrkjum. Hvert og eitt verkefni verður metið með tilliti til verklagsreglna sem gilda um styrkveitingar hjá forsvarsaðilum verkefnisins. Virk þátttaka í fyrri stigum verkefnisins eykur hins vegar líkur á að verkefni séu vel undirbúin og þar með aukast líkur á styrkjum.

Leiðsögn og frekari upplýsingar

Þátttakendum í verkefninu mun á verkefnistímanum standa til boða leiðsögn hjá starfsmönnum Impru og stuðningsaðilum í heimabyggð. Framkvæmd verkefnisins á haustmisseri 2008 er unnin í samstarfi við Búnaðarsamtök Vesturlands og Atvinnuþróunarfélag Vestfjarða.

Hér til vinstri eru tenglar á námskeiðsdagskrá Vaxtarsprota og nánari upplýsingar um fræðsluhluta verkefnisins. Þar er einnig að finna kynningarbækling verkefnisins fyrir haustmisseri 2008. Elín Aradóttir verkefnisstjóri hjá Impru veitir nánari upplýsingar um verkefnið í síma 4607970 eða gegnum tölvupóst elina@nmi.is.

Fræðsluhluti Vaxtarsprota samanstendur af 32 klst. námskeiði. Hin eiginlegu námskeiðsskipti eru átta talsins en einnig verður boðið upp á tvær opnar vinnusmiðjur fyrir þátttakendur. Aðalkennari á námskeiðunum er G. Ágúst Pétursson viðskiptaráðgjafi og leiðbeinandi í frumkvöðlafræðum.

Viðfangsefni námskeiðs

1. Kynning á námskeiðsferlinu og námskeiðsgögnum, hugmyndavinna, stefnumótun og markmiðasetning.
2. Gerð viðskiptaáætlana, vöru- og þjónustuþróun.
3. Verkefnastjórnun og áætlanagerð.
4. Opin vinnusmiðja*,  þátttakendur vinna í eigin verkefnum.
5. Markaðsmál, markaðsgreining og markaðsupplýsingar.
6. Rekstrarform fyrirtækja og ýmis hagnýt atriði um fjármál.
7. Gerð markaðsáætlana.
8. Opin vinnusmiðja*, þátttakendur vinna í eigin verkefnum með áherslu á fjárhagsáætlanagerð.
9. Kynningartækni og upprifjun.
10. Kynning þátttakenda á viðfangsefnum sínum. Útskrift af námskeiði.

* Vinnusmiðjur teljast ekki til námskeiðskennslustunda

---