Sóknarfæri í umhverfisvænum afurðum - Fréttir

Íslensk matorka ehf. er einn styrkhafa atvinnumála kvenna árið 2011 og hlaut styrk til að markaðssetja íslenskan hlývatnsfisk á Evrópumarkað. Um er að ræða nýja framleiðslu á Íslandi þar sem jarðhitavatn er nýtt til að ala fisk sem lifir við kjöraðstæður 27-28°C. Framleiðslan fer í dag fram í fiskeldisstöðinni Fellsmúla í Landssveit í Rangárþingi ytra.

Fyrirtækið stefnir að því að þróa eldið þannig að það fái viðurkenningu sem vistvænt (low carbon footprint) og jafnvel lífrænt eldi og mun það styrkja fyrirtækið enn frekar. Þannig er horft til þeirra miklu sóknarfæra sem við Íslendingar höfum varðandi það að framleiða og selja hágæða umhverfisvænar afurðir  inn á svokallaða „high end“ markaði. Hér er því um nýjan útflutningsiðnað að ræða fyrir Ísland með nánast óþrjótandi afleiddum (,,spin-off“) tækifærum í framleiðslu á fóðri og fóðurhráefnum, fullvinnslu afurða, nýtingu á næringurríku affallsvatni frá fiskeldinu í gróðurhúsaræktun (svonefnt aquaponics), nýtingu afskurðar frá fiskinum í fóðurhráefni fyrir aðrar tegundir, nýtingu á roði til leðurframleiðslu, fullvinnslu fiskafurða og svona mætti áfram telja.

Hverjar eru konurnar á bak við Matorku?
Íslensk matorka ehf. er í eigu þriggja kvenna. Ragnheiður I. Þórarinsdóttir er með doktorspróf í verkfræði og MBA, Sjöfn Sigurgísladóttir er með doktorspróf í matvælafræði og Stefanía K. Karlsdóttir er með BSc gráðu í matvælafræði og MBA. Þær hafa allar mikla reynslu af stjórnunarstörfum og stunduðu rannsóknir og þróunarvinnu á árum áður. Frítíminn er jafnan nýttur til útivistar með fjölskyldunni eða til að taka í bridge-spilin.

Hvernig kviknaði hugmyndin ?
Hugmyndin að verkefninu kviknaði á haustmánuðum 2009 eftir nokkra hugarflugsfundi um hvað Ísland hefði upp á að bjóða fram yfir aðrar þjóðir, þ.e. hvar samkeppnishæfnin okkar liggur. Stefnan var sett á að auka framleiðslu á hágæðavörum til útflutnings. Niðurstaðan var alltaf sú sama, að stóru tækifærin væru í því að nýta auðlindir okkar í sátt við umhverfið og byggja á jákvæðri sögu fiskútflutnings frá Íslandi og þeirri ímynd sem við eigum sem hreint og fagurt land, ríkt af vatnsorku og jarðhita.

Hvað hvetur ykkur mest áframog hvað er erfiðast?
Árangur er það sem hvetur okkur mest áfram til vinnu. Samstarf við dugmikið fólk hjálpar manni að ná árangri þannig að vinnan okkar byggir á því að fá önnur fyrirtæki og vísindamenn til samstarfs bæði hérlendis og erlendis og er nú þegar komið gríðarlega stórt tengslanet í kringum okkur.
Óvissan um rekstrarniðurstöðuna er líklegast erfiðasti hluti frumkvöðlastarfsins. Maður þarf að hafa óbifandi trú á því sem maður er að gera og að maður nái alla leið með hugmyndir sínar.

Hver eru næstu skrefin hjá fyrirtækinu?
Næstu skref eru að kynna framleiðsluna. Þá er unnið að því auka framleiðslugetu stöðvarinnar fyrir austan og að fá fjárfesta til að byggja með okkur enn stærri stöð. Samhliða erum við að kynna hugmyndir okkar fyrir stjórnvöldum og hagsmunaaðilum því við sjáum hér gríðarlega möguleika á að margfalda fiskeldi á Íslandi, skapa hér mörg hundruð störf á fáum árum og fá gjaldeyri til landsins.

Við viljum nota tækifærið til að þakka Atvinnumálum kvenna fyrir styrkveitinguna. Það er okkur afar mikils virði að finna fyrir þeim stuðningi og upplifa að aðilar hafi trú á því sem við erum að gera.
Ef við vinnum að því saman á Íslandi að nýta auðlindir okkar á umhverfisvænan hátt til að framleiða hér útflutningsverðmæti verður hér fljótlega mikil og heilbrigð gróska í atvinnumálum.

Hlývatnsfiskurinn Tilapia