Ísland allt árið ! - Fréttir

Landsbankinn og iðnaðarráðuneytið auglýsa eftir umsóknum um styrki í þróunarsjóðinn, Ísland allt árið. Markmið sjóðsins er að lengja ferðamannatímabilið á Íslandi, með því að styrkja þróun afurða og upplifana utan háannatíma ferðaþjónustu og auka þannig arðsemi fyrirtækja í geiranum.

Stutt verður annars vegar við verkefni fyrirtækja sem geta lengt ferðamannatímann á tilteknum svæðum og hins vegar við samstarfsverkefni fyrirtækja sem hafa hug að því að þróa sameiginlega þjónustu sem gæti lengt ferðamannatímabil á landsvísu eða á fleiri svæðum á landinu.

Í umsókn þurfa að koma fram skýrar hugmyndir um þá þjónustu og upplifun sem skila eiga í senn aukinni atvinnu og varanlegum verðmætum. Verkefnin verða að koma til framkvæmda innan þriggja ára frá því að styrkur er veittur.

Umsóknarfrestur er til 10. janúar 2012 og er gert ráð fyrir að styrkir verði veittir í febrúar.

Allar nánari upplýsingar er að finna á landsbankinn.is