Eldmóður, þrautseigja og þolinmæði - Fréttir

Í alþjóðlegu athafnavikunni, sem haldin var dagana 16-22 nóvember voru haldnir opnir athafna- og hugmyndafundir á þremur stöðum á Norðurlandi vestra, á Sauðárkróki, Blönduósi og á Hvammstanga. Fundirnir voru liður í alþjóðlegri athafnaviku en tilgangurinn með henni var m.a. að benda á að allir geta lagt hönd á plóg við að færa fram eitthvað jákvætt til samfélagsins. Einnig var markmiðið að koma af stað öflugri hugmyndavinnu þar sem unnið væri með tækifæri og möguleika á svæðinu. Að fundunum stóðu Atvinnumál kvenna, Byggðastofnun, Impra á Nýsköpunarmiðstöð, Menningarráð Norðurlands vestra, Vaxtarsamningur Norðurlands vestra, Virkja - Norðvestur konur og Vinnumálastofnun Norðurlandi vestra.
Ágæt mæting var á fundina en alls sóttu þá um 40 manns.

Dagskrá fundanna var á þann veg að fyrst var kynning á þeim þáttum sem einkenna frumkvöðla og þar voru nefnd orð eins og eldmóður, orka, þrautseigja, trú á sjálfum sér og jákvæð hugsun. Eftir það var unnið var með þær hugmyndir sem fram komu meðal þátttakenda.

Reynslusaga frumkvöðuls var næst á dagskrá og þar fræddu Kristján Blöndal, Kjalfelli á Blönduósi,  Jóhann Albertsson, Sveitasetrinu Gauksmýri og Hanna Þrúður Þórðardóttir, framkvæmdastjóri Dýrakotsnammis á Sauðárkróki, viðstadda um reynslu þeirra af því að stofna og reka fyrirtæki.  Margt fróðlegt bar á góma í þeim erindum og sérstaklega skemmtilegt að heyra hvernig hugmyndir geta kviknað og orðið að öflugum atvinnutækifærum.

Í lok fundar kynntu fundarboðendur þá þjónustu og möguleika sem felast í þeirra störfum en allir sinna þeir aðstoð við frumkvöðla á Norðurlandi vestra og aðra þá sem vilja vinna með sínar hugmyndir. 

Meðfylgjandi myndir voru teknar á fundinum á Sauðárkróki.