Enginn dagur eins í Hugmyndahúsinu - Viðtöl

Hugmyndahús háskólanna er samstarfsverkefni Háskólans í Reykjavík og Listaháskóla Íslands, þar sem allt er inni í myndinni og ekkert er ómögulegt. Það tengir saman skapandi greinar við tækni, vísindi og viðskipti. Í Hugmyndahúsinu er frumkvöðlasetur þar sem allt að 25 fyrirtæki geta haft aðstöðu  en á því rúmlega eina og hálfa ári sem það hefur starfað hafa 59 fyrirtæki/verkefni fengið aðtöðu og um 159 störf orðið til.  Einnig hefur Hugmyndahúsið í samstarfi við Faxaflóahafnir rekið Útgerð Hugmyndahússins í Bakkaskemmu við Grandagarð þar sem kjarnastarfsseminni hefur verið spyrt saman við sviðlistir. Það er því lífleg og fjölbreytt starfssemi innan Hugmyndahúss háskólanna.

Okkur langaði að vita meira um Hugmyndahúsið og þá sem standa að rekstri þess. Ingibjörg Gréta Guðmundsdóttir er framkvæmdastjóri og frumkvöðull og stýrir verkefninu.

Hvernig varð hugmyndin að  Hugmyndahúsinu til?

Það voru rektorar beggja háskólanna þau Hjálmar H. Ragnarsson og Svafa Grönfeld  sem tóku höndum saman haustið 2008  og stofnuðu Hugmyndahúsið sem þeirra svar og aðgerð við kreppunni.  Þau ákváðu að skapa tækifæri og vettvang til að grasrótin fengi skjól , næringu og beina tengingu inn í háskólana  og að sama skapi að háskólarnir fengju grasrótina beint í æð.
 Háskólarnir tveir taka þátt í verkefninu og eru eigendur þess eins og áður sagði. En við fáum líka til okkar fagaðila úr öllum geirum til að aðstoða og veita ráð. Frumkvöðlarnir eru einnig boðnir og búnir að vinna saman, aðstoða, deila upplýsingum og hjálpa til við að ýta fólki af stað, yfir hindranir og frekari þröskulda. Það er mjög gefandi að sjá hugmyndafræðina virka, að allir séu boðnir og búnir að greiða götur hvers annars til að tryggja að sem flestir komist á flug.

Hver eru helstu verkefnin hjá ykkur?

Helstu verkefni er teygjanlegt hugtak í þessu tilfelli því það er enginn dagur eins og verkefnin mismunandi eins og þau eru mörg. Við tökum á móti fólki alla daga með hugmyndir og leiðbeinum þeim áfram. Einnig tökum við á móti hópum innlendum jafnt sem erlendum þar sem við kynnum okkur, segjum reynslusögur og hvetjum fólk áfram. Svo höfum við verið með viðburði, vinnusmiðjur og hugarflugsfundi svo ég nefni nú aðeins brot af starfinu.

Kjarnastarfssemin er þó alltaf sú sama að tengja þessi ólíku svið saman það er að segja skapandi greinar við tækni, vísindi og viðskipti.  Sem hluta af því vorum við með Hugmyndasmiðjunna 2010 nú í haust þar sem 120 hugmyndasmiðir unnu að 70 hugmyndum. Þetta var 6 vikna ferli þar sem unnið var í  ferðalagi hugmyndarnnar tvisvar í viku. Í gegnum Hugmyndasmiðjunna fengum við góða styrktaraðila sem gáfu fjármuni í hvatningarverðlaun og gerðu okkur kleift að hvetja 6 hugmyndir áfram.  

Í dag eru um 20 fyrirtæki með aðstöðu í húsinu. Þau eru til dæmis prjónaferðaþjónusta, arkitektar, vöruhönnuðir, menningarstjórnendur, vefsíðuhönnuðir, tölvuleikjafyrirtæki, kvikmyndafyrirtæki, þjónustufyrirtæki, tæknifyrirtæki , bókhaldsfyrirtæki og fréttablað svo fátt eitt sé nefnt.

Hvernig fara frumkvöðlar að því að komast að hjá ykkur?

Það er mjög einfalt. Umsækjendur einfaldlega senda okkur tölvupóst, segja um hvað hugmyndin snýst, að hverju þeir ætla að vinna í Hugmyndahúsinu og hvaða markmiðum þeir ætla að ná næstu 3,6 og/eða 9 mánuði. Einnig biðjum við umsækjendur um að segja okkur hvað þeir geta lagt til samfélags okkar og hvað samfélag Hugmyndahússins getur fært þeim, sérstaklega í ljósi markmiðaanna sem þeir setja sér.

Hvað er skemmtilegast í vinnunni ?

Það er aldrei lognmolla í Hugmyndahúsinu og þar er hver dagur sannkallað ævintýri. Ég persónulega fæ mikið út úr því að aðstoða frumvöðlana og hjálpa þeim að ná markmiðum sínum, ég hreinlega þrífst á því. Einnig eru það forréttindi að fá allt þetta fólk til okkar sem er með hugmynd í kollinum og þarf ábendingar um næstu skref. Það að lækka þröskulda svo það nái árangri veitir mér sérstaka ánægju og ég fyllist eldmóði við það eitt að hugsa um það.

Hvað er framundan hjá ykkur?

Verkefnið eins og háskólarnir settu það fram mun ljúka nú um áramótin. Það er hreinlega ekki til fjármagn hjá þeim til að halda því áfram, því miður.  Við höfum því lagt Hugmyndahúsið fram til ríkisins ef það er áhugi þar innandyra að halda starfsseminni áfram. Við bíðum spennt eftir svörum þaðan.  Við erum einfaldlega sproti sjálf sem er í fjárhagslegri óvissu en erum tilbúin til að halda starfinu áfram ef ríkisstjórnin setur það í farveg innan sinnar nýsköpunar- og menntunarstefnu. Við vonum það besta því við  eigum margt eftir ógert.

Eitthvað að lokum?

Það eru forrréttindi að vinna í Hugmyndahúsi háskólanna því þar ríkir jákvæðni og óbeislaður frumkraftur sem gott er að vera í návígi við. Ég vildi óska að við gætum smitað enn frekar út frá okkur  til að fleiri gætu notið alls þess sem við höfum upp á að bjóða. Svo ég tala nú ekki um hve heitt ég óska þess að við fáum  rekstrargrundvöll til  áframhaldandi starfssemi því hugmyndafræði Hugmyndahússins hefur einfaldlega verið að virka.