Byggðastofnun

Byggðastofnun vinnur að eflingu byggðar og atvinnulífs á landsbyggðinni. Starfsemin skiptist í tvo meginkjarna, þ.e. lánastarfsemi og þróunarstarfsemi. Byggðastofnun undirbýr, skipuleggur og fjármagnar verkefni og veitir lán með það að markmiði að treysta byggð, efla atvinnu og stuðla að nýsköpun í atvinnulífi. Byggðastofnun fylgist einnig með þróun atvinnulífs og byggðar í landinu. Byggðastofnun vinnur að stefnumótandi byggðaáætlun fyrir allt landið í samráði við iðnaðarráðherra.

Þróunarsvið Byggðastofnunar tekur eftir atvikum þátt í innlendum og erlendum samstarfsverkefnum á sviði byggða- og atvinnuþróunar, meðal annars innan ramma Evrópusambandsins og Norðurlandaráðs. Þá hefur sviðið meðal annars umsjón með þátttöku Íslands í Norðurslóðaáætlun Evrópusambandsins (NPP) og Norrænu Atlantshafsnefndinni (NORA).

Byggðastofnun hefur sinnt konum og verkefnum þeirra sérstaklega í gegnum tíðina og voru á sínum tíma jafnréttisráðgjafar starfandi á landsbyggðinni á vegum stofnunarinnar. Í mars 2010 voru veittir fjórir styrkir til kvenna sem hafa hug á að markaðssetja hönnun erlendis, hver að fjárhæð tvær milljónir króna. Starfssvæði Byggðastofnunar er á landsbyggðinni og því geta konur á höfuðborgarsvæðinu hvorki sótt um styrki né lán hjá stofnuninni.
Í byggðaáætlun 2006-2009 er kveðið sérstaklega á um konur og atvinnurekstur sem hér segir: „Unnið verði að því að efla þátt kvenna í atvinnurekstri með ráðgjöf og námskeiðum. Hugað verði að leiðum til þess að gera stoðkerfi atvinnulífsins aðgengilegra fyrir konur."

 

.

---